Приветствие царевне Софье Алексеевне
Благородная София царевна,
Госпожа княжна Алексиевна!
Пречестна дева и добросиянна,
В небесную жизнь Богом произбранна!
Мирно и здраво от Господа света
Буди хранима во премнога лета.
Убо мудрость есть росски толкована,
Еллински от век Софиею звана.
Любители той философы звались
И добронравством тоя украшались.
От онуду же, древле любомудрых,
Во учении зело многотрудных
Рекший, разуму прилагая себе,
Приложит болезнь, приим труд на себе,
Радостно сице беседу творяше
Рачитель бых той доброты вещаше,
Она бо учит правде и мужеству,
Наипаче же Божию дружеству,
Их же требнее ничто человеком,
Текущим присно к прерадостным веком.
Мудростию бо вси цари царствуют
И вси велможи добре началствуют,
Мудростию же вся управляются,
И о том люди вси утешаются;
Ею здравствуют удобь человецы,
И счисляются времена и вецы;
Ею по морю плавают удобно
Во время люто и зело безгодно.
Ею живуще люди благочестно
К Богу очима смотрят непрелестно;
Ею девственны велми хранят цветы
И чисты сердцем зрят Божия светы;
Ею во мире вся блага бывают,
Разум, богатство люди обретают.
Мудрости бо несть подобие кое,
Яко гонит лесть и всякое злое.
Каменье драго пред нею меньш песок,
Понеже тоя чист разум высок,
Разум подает и в добро охоту,
Токмо да любит всяк ея доброту.
В юности искавши невесту водити
Не устыдеся о ней возгласити:
Ничто же убо Бог благий возлюбит,
Точию сего, иже дней не губит:
Но с мудростию присно пребывает
И конец всех дел известно смотряет.
Зде во велице России издавна
Мудрость святая пожеланна славна:
Да учатся той юнейшыя дети
И собирают разумные цвети;
Навыкнут же той свершении мужи,
Да свободятся от всякия нужи;
Престаревшии видев в юных тую,
Воскликнут творцу всех песнь тресвятую...